ဂန္တ၀င်အချစ်စကားများ ON LOVE

           အစကတော့ Love ဆိုတဲ့ အင်္ဂလိပ်ဝေါဟာရကို အကျယ်ဖွင့်ကြည့်ဦးမလို့ပါပဲ ဒါပေမဲ့ အချစ်ရဲ့ အဓိပ္ပါယ်ကို စုံစေ့အောင်ပြောရရင် သူကိုတိုင်က စာတစ်ပုဒ်ဖြစ်သွားမှာမို့ အထူးဖွင့်ဆိုမနေတော့ဘဲ သူ့နည်းတူ အဓိပ္ပါယ်မျိုးဆုံထွက်တဲ့ "အချစ်" ဆိုတဲ့မြန်မာဝေါဟာရနဲ့ အတူတူလို့ပဲ ထားလိုက်ကြရအောင်။
           ကိုင်း
           Loveဆိုတဲ့ အချစ်အကြောင်း၊ ရှေးပညာရှိတွေ ရှုထောင့်အဖုံဖုံက ဘယ်နည်းဘယ်ပုံတွေ ပြောခဲ့ကြသလဲ။
            အချို့ကအချစ်ကို အဓိပ္ပါယ်ဖွင့်တယ်။ အချို့ကအချစ်ရဲ့ သဘောသဘာဝတွေကို တစေ့တစောင်း ဖော်ညွှန်းတယ်။ အချို့က အချစ်ကိုဝေဖန်တယ်။ အချို့က အချစ်ကို.....။
            အဲဒီလိုတွေထဲက ဦးစွာပထမ၊ မြင်မြင်ချင်း ချစ်မိတယ် (Love at first sight) ဆိုတဲ့စကားတချို့ကို အရင်ကောက်ပြောရရင်၊
            အင်္ဂလိပ်ကဗျာဆရာ ဘာနဘီဂူးခ်ျ (Barnaby Googe)(1540-94) ရဲ့ကဗျာမှာ၊
            There is a lady sweet and kind,
            Was never face so pleased my mind,
            I did but see her passing by,
            And yet I love her till I die.
            ဒါလောက် နှစ်သက်စရာ ချိုရွှင်ကြင်နာတဲ့ မျက်နှာမျိုး တစ်ခါမှ မတွေ့ဘူးပါဘူးတဲ့။ ဖြတ်သွားတာလေး မြင်ရုံမြင်မိလိုက်တာနဲ့ သက်ဆုံးတိုင်ချစ်သွားမိပါသတဲ့။
            အရမ်းချစ်ချင်နေတဲ့ ပုဂ္ဂိုလ်တွေ။ သေသေချာချာတောင် မမြင်ရသေးဘူး၊ ဇွတ်ချစ်ပြစ်တာ။ ဒါကြောင့်မို့ တချို့ ပုဂ္ဂိုလ်ကြီးတွေက အချစ်မှာမျက်စိမရှိဘူး ( love is blind.) လို့ ဆိုကြတာ။
             love is blind. ဆိုတဲ့ စကား စပြောသူက အင်္ဂလိပ်စာဆိုကြီး ချောဆား (Geoffrey Chaucer)
တချို့အချစ်သမားက ဘယ်လောက်တောင် blind ဖြစ်သလဲဆိုရင် အသားမည်းမကို နီရွှေရောင်လေးလို့မြင်တယ်။ ပိန်တာရိုးကို သမင်မပျိုလို့ထင်ပြီး၊ ထုံအအမိန်းမက က္ကုနြေ္ဒရတဲ့ မိန်းမဖြစ်သွားတယ်။
             အဆုတ်တီဘီရောဂါ (consumption) ကျွမ်းနေသူကို သွယ်လျလျကိုယ်လုံးပိုင်ရှင်လို့မြင်ပြီး၊ ဧရာမနို့အုံနဲ့ ဘုတ်ဆုံမကို ဆီးရီးစ် နတ်သမီး ကိုယ်ထင်ပြသလားအောက်မေ့ကြတယ်တဲ့။ ချစ်မိပြီဆိုတဲ့နောက်မှာတော့ မျက်စိသာမဟုတ် စဉ်းစားညဏ်ပါ မရှိနိုင်တော့ပါဘူး။
             ရှိတ်စပီးယား ကလည်း ပြောပါတယ် ချစ်လည်းချစ်ဖို့ စဉ်းစားညဏ်လည်း ရှိဖို့ဆိုတာ လူ့စွမ်းအား နယ်ပယ်ကို ကျော်လွန်သွားတဲ့ ကိစ္စပါတဲ့။
             To be wise and love
             Exceeds man's might. လို့ ဆိုပါတယ်။
             ရောဘတ်ဟဲရစ် ဆိုတဲ့ပုဂ္ဂိုလ်ကလည်း ဒီသဘောအတိုင်းပဲ ပြောခဲ့တယ်။
             No man, at one time, can be wise and love. တဲ့။
             အချစ်နဲ့ ပတ်သက်တဲ့ စကားတွေ အများကြီး ပြောခဲ့တဲ့ ရှိတ်စပီးယားပဲ As You Like It ပြဇာတ်ထဲမှာ ပြောထားတာ တစ်ခုရှိသေးတယ်။
             ချစ်တယ်ဆိုတာ ရူးတာတဲ့။ ရူးတာမှ တကယ့် စိတ်ရောဂါသည် အစစ်တွေလို အလုံပိတ်အခန်းထဲထည့်ထား၊ ကြိမ်နဲ့နာနာဆော်ထားရလောက်အောင်ကိုရူးတာတဲ့။ ဘာကြောင့် အဲဒီလို တကယ်ရိုက်ပြီး မကုဖြစ်သလဲဆိုတော့ ကြိမ်ရိုက်မယ့် လူတွေကိုယ်တိုင်ကလည်း အချစ်ရူးရူးနေကြလို့တဲ့။
             ရှိတ်စပီးယားက ကြိမ်ဆော်ခိုင်းနေပေမဲ့ စပိန်ပြဇာတ်ရေးဆရာ ပေဒရိုကဲလ်ဒရွန် ကတော့ အချစ်ဆိုတာရူးမှတဲ့။
              Love that is not madness is not love.
              မရူးရင် အချစ်စစ် အချစ်မှန် မဟုတ်ဘူးတဲ့။
                   
                    ဖေမြင့်